每年執衣櫃，都會喺入面搵返啲買咗返嚟但係冇著過嘅衫褲，明明買嗰陣好鍾意㗎，點解會放咗落衣櫃底㗎呢？不過最幸福嘅毛文都係你著上身嘅時候，竟然仲啱著呀！有個網友搵到條好耐冇著嘅褲，心裡暗爽緊自己仲啱著嘅時候拎條褲去洗，點知就出事喇！

呢兜嘢咁似花田囍事嗰兜洗腳水嘅，咩嚟㗎？唔通條牛仔褲甩色？不過啲衫褲甩色都唔出奇嘅，特別喺洗緊啲深色衫褲，冇染到其他衫咪算囉～話唔定出嚟變咗洗水款仲有型呢～點知呢位妹豬越洗越覺得唔對路，洗極都仲甩嘅喂！

X！原來條褲唔止甩色咁簡單，仲喺水度分解咗呀！仲要分解得咁招積，淨返個牌子咁完整喺度，咩玩法呀？

見到條褲咁，妹豬梗係要搵客戶服務complain下啦～客戶服務亦都好有耐性咁解釋佢聽，呢種褲放太耐唔著，個質料會老化變硬，所以真係有機會溶喺水入面㗎。再幫佢check一check個record，原來條褲係2012年買嘅⋯⋯

原來係一條畀世界遺棄咗成5年嘅牛仔褲，唔怪得之佢咁睇唔開啦，真係要唱返句「讓你愉快，讓我瓦解」呀～

其他網民見到呢件事，都忍唔住同妹豬講聲，我真係恭喜你呀，咁環保嘅牛仔褲都畀你買到。有網友仲話見到都想買返條畀女朋友咁話喎。其實望真啲，條褲穿窿都穿得幾Sexy吖，潮流興著咗好似冇著咁㗎嘛～55，著呢條褲出街，一定吸引全場目光呀！話晒fat唇嘅嘢，你識條橡筋咩～

封面圖片及資料來源：Wei Bear