一個普通人要升呢做地獄廚神其實好簡單，你只要將一啲好普通嘅食材用正常嘅方法整出異常嘅結果，然後PO上FB公告天下，呢道菜就會成為你嘅代表作㗎喇！咁做唔止可以升呢，仲分分鐘一夜爆紅?！好似呢位網友咁，見阿媽買嗰盒麻糬放咗入雪櫃之後凍過飯冰冰，咪拎去蒸蒸佢囉。

一蒸就出事喇，你sure唔sure呢兜嘢真係麻糬呀？呢Pat糊狀物嘅質感黏滑黏滑咁，又有啲啡啡黑黑嘅固體包喺入面，仲暖㗎?！真係似新鮮熱辣嘔出嚟咁呀，唔好話食咗佢，睇到即刻有啲飽呀⋯⋯

蒸麻糬呢家嘢咁講火候又係難啲嘅，不如簡單少少煲個湯圓吖～反正就嚟元宵節，食個湯圓應下節都好㗎。啲湯圓都喺街度現成買返嚟，一定唔會伏啦啩～但係點解啲湯圓唔係跟湯，係跟啲五顏六色嘅糖嘅？望住啲糖仲要有一種隱隱約約嘅親切感?！

原來係爆炸糖呀！是咁的，有位網友見過年想同班同事食下湯圓，點知煮好咗之後，同事變咗幾包爆炸糖出嚟，逼網友陪佢食爆炸糖湯圓呀！同事隨身帶住爆炸糖，應該都係食家嚟，冇事嘅冇事嘅！不過似乎個事主食完之後就唔打算再試第二次喇。又係嘅，生命冇take 2 吖嘛……

嚟緊元宵節有女陪嘅朋友，記得帶定幾包爆炸糖傍身喇～隨時有用㗎！嗱嗱嗱，毛毛講緊食湯圓咋～就算係毒L都不妨打下大佬吖，咁咪就算冇女都有得啪啪聲囉～

封面圖片及資料來源：mark450450／PTT、DoURember／PTT

同場加映：【好強怨念】嚿麻糬蒸完就變到咁樣樣喇…