聽人講，所謂「拍拖」，就係兩個人不停問對方今日食咩好，直到死為止。唔好咁膚淺啦，你估真係得拖友先識得問咩，單身狗都一樣會諗呢個咁有啟發性嘅問題㗎，不過係問自己咋嘛。日日都係咁自問自答，又真係會人都癲嘅，而家又咁興網上公投，不如試下開放投票，由班三唔識七嘅口水友決定命運啦！

最近日本有個漫畫家喺twitter畀大家公投佢午餐食咩喇，每次佢都會畀幾樣嘢大家揀嘅。第一日，就有咖哩飯、海鮮丼、粟米脆筒參選喇！好緊張呀，唔知大家會撐邊個呢！

結果係……粟米脆筒呀！咖哩飯同海鮮丼平時食都得啦，網民見你夠膽玩網上公投咁創新，知你係個創作人，先特登揀粟米脆筒迎合你口味，畀你走出comfort zone啫！

第二日嘅候選人就包括：蒿麥麵、燒雞丼、粟米脆筒配五粒福豆。

燈燈燈凳！粟米脆筒成功連任呀！我真係恭喜你呀！

好喇到咗第三日，就有蒿麥麵、燒雞丼、海苔配一粒豆，同埋新上場嘅雪糕筒！不過講明先呀，唔係齋係脆筒，而係擺馬路邊嗰種硬膠筒呀……

唔使問阿貴，都知道班PK會投晒雪糕筒啦……老師，你又話人之初性本善嘅？

第四日，可能漫畫家真係始終相信人性光輝一面啦，開放咗咖哩飯、門松配仙貝、氣球配仙貝畀大家揀，仲特登寫埋自己真係好想食咖哩飯，諗住拉下票。而下場就係……唉，其實都估到結果㗎啦，漫畫家不如你都係放棄啦！

第五日，可能佢個胃真係頂唔順喇，唯有畀啲堅食物大家揀，候選人包括咖哩飯同埋淨沙律醬。可惜事與願違，睇人PK果然真係人類嘅無國界最大共同興趣，有55％嘅選民都揀咗淨沙律醬呀！唔通呢埸人性社會實驗係100％ fail嘅？！

最後，喺第六日，漫畫家盡地一舖，畀皮靴、木材、鐵同埋咖哩飯大家揀，結果真係好令人感動呀！餓咗差唔多成個星期，佢終於可以正正經經食到碗咖哩飯喇！不過揀咖哩飯嘅都係得35％啫，唔似之前嘅勝出者咁大比數拋離，換句話講，即係有65％人都係想睇佢冇啖好食……唉，你都係食餐飽飯繼續上路啦。

封面圖片、資料來源連結： yashi09／twitter