古乳有暈，人有三衰六旺，一個人時運低好容易撞嘢㗎，例如經過走廊見到隔籬屋大媽著住紅色透視裝，或者夜媽媽行過殘廁聽到啲此起彼落嘅痛苦呻吟聲，唯有唸住「時運高聽唔到⋯⋯睇唔到⋯⋯」急急腳走啦！但係有啲嘢喺正你面前就真係好難扮睇唔到囉⋯⋯

台灣有個網友去停車場攞車，諗住去畀車費先啦，點知畀佢見到另一個空間嘅入口呀！唔係講緊大雄個櫃桶呀，而係呢個繳費亭呀！呢隻藍色配埋白色，再加埋佢啲花紋，借埋隔籬嗰兩個白燈籠就可以上路喇啵！見到都唔知入唔入去交錢好呀，話晒入面秒秒鐘幾百萬上落，點好意思叫你找喎～

官方就話其實呢個設計嘅概念係嚟自青花瓷，藍藍白白夠傳統吖嘛，佢冇錯喎。而家都幾符合傳統吖，不過係白事嗰方面咁囉。

「喂，靚女，夜媽媽一個人好危險㗎啵～」

半夜三更喺衣紙鋪外面擺個咁嘅公仔喺度係咩玩法！個公仔仲要用一個咁友善嘅眼神，同咁輕挑嘅甫士望住你笑，真係笑到你心都寒埋呀⋯⋯

對唔住呀大佬！細路仔唔識世界，我而家就走㗎喇⋯⋯咦？公仔嚟㗎喎。原來唔係行錯咗入結界，呢個又係南投燈會嘅精選作品呀～呢個咁詭異嘅氣氛，一定係諗住可以留返七月十四用喇，55，一定係咁，難得一班公公婆婆咁支持環保，真係要畀個like佢哋呀！

封面圖片及資料來源：Jiang Guo Hao 、瘦逼八、劉俞