早前日本Meiji就推咗一款新產品「士多啤梨蛋糕雪糕」，一層蛋糕、一層雪糕，再加上面頭嗰層有果肉嘅士多啤梨醬，真係諗起都出晒口水呀！最近，有日本網民就咁啱撞正呢款雪糕做特價，狗衝去買嚟試下嘞。

而便利店店員知道呢排天氣凍，驚杯雪糕太硬會整斷隻羹，佢仲特登畀多隻羹呢位網民?～嘩，大家睇下呢位店員細心到呢，唔怪之得個個去完日本都大讚日本人貼心啦！今時今日咁嘅服務態度……係抵讚嘅。

果然想食到呢杯雪糕都唔係咁容易呀下……呢位網民隻羹咁就啪斷咗喇！不過唔緊要，好彩有貼心店員畀多隻羹，一次唔得咪再試多次囉，希望再明天吖嘛～

嗯，係就係希望在明天，不過而家仲係今天呀……呢位網民竟然啪斷咗兩隻羹都未食到杯雪糕？嗚哇，唔通連個天都唔鍾意呢位網民？！

其實呢位網民又唔使咁灰9嘅，你睇下早前另一位日本網民，人哋用五隻羹都全軍覆沒咪又係咁！計毛毛話，其實個天已經好鍾意你㗎喇，所以你就畀啲耐性等杯雪糕冇咁硬嗰陣再食啦好嗎？

@SteinsGate 誰もお前を愛さない。 pic.twitter.com/ohPwbrjGqp

— 青井ひなた@ひまわり堂 (@SteinsGate) 2017年2月9日

資料來源：SteinsGate／twitter、YatsuMaga_82／twitter

回帶：【連個天都唔鍾意我】個雪糕硬到連鐵匙羹都整彎埋係咩玩法？

又回帶：【前路受重創】究竟我仲要整斷幾多支羹先食到杯雪糕