那些年，唔少人都去過交通城學做一個精明駕駛者（或者路人），最開心嘅毛文就梗係趁Miss睇唔到，坐上架車度同隔籬同學仔一齊頭搖又尾擺，違反晒啱啱教嗰啲規則啦！嗱，細個曳曳豬最多都係畀Miss釘牌，即係唔畀你做司機啫，但大個揸車唔聽話，小則荷包出血，大則就搞出人命㗎喇……

作為一個聰明嘅路面使用者，梗係要一眼關七，留意路面情況……同埋留意有冇相機影快相㗎啦。好似呢位台灣網民咁就叻豬呢，離遠見到部快相相機就即刻減速扮乖，咁咪唔使驚會畀人罰錢囉。之不過咁，點解呢部相機好似怪怪地咁嘅？

＿你個街吖，紙板嚟嘅喂？雖然呢塊紙板係就係欺騙咗你感情，但你都唔使咁勞氣嘅～聽其他住嗰頭嘅網民話，本來呢個位真係有部相機喺度㗎，只係而家搬咗去隔籬街咋嘛……喂，冇咗部機都要放返塊紙板，算係咁啦！

其實呀，講到尾咪又係怕你哋班友仔唔見快相唔收油，所以人哋咪採用3D變2D嘅低科技技術，等你班友仔唔好見條路人少少就當正自己係車神咁9衝囉。

btw，以毛毛9估，唔通塊牌嘅作用係想搞到你哋疏於防範，等遲啲換返部真機嘅時候有功立又要話你知咩？應該係，除非唔係，55。

封面圖片及資料來源：顏上總