家陣天寒地凍，有邊個唔想全日留喺個暖笠笠嘅被竇度吖？不過為咗搵啖食，唔少人就算面對幾凍嘅天氣都要局住頂硬上……唉，總之就搵食艱難啦！而講到搵食艱難嘅又點止人類，佢哋都一樣呀！

講緊嘅咪呢兩隻為咗搵食搞到自己變雪條嘅翠鳥囉……

話說呢兩隻翠鳥係喺德國畀人發現嘅。因為翠鳥習慣飛入個湖度捉魚食，所以大家就估呢兩隻雀仔應該係搵食嘅時候唔小心畀低溫急凍結冰，連個甫士都仲停留喺衝刺嘅狀態嘞。

成個湖都結咗冰，要搵人用鋸先拎到佢哋出嚟㗎咋。

慘嘅又點止呢兩隻雀仔。早前喺德國有隻狐狸又係一個唔小心跌咗落個湖度，於是就變咗雪條喇！雖然呢幾隻動物都救唔返，但鋸佢出嚟嘅獵人都想透過今次呢件事教訓大家要小心，因為喺結冰嘅湖度玩真係好危險，分分鐘會出事㗎！

封面圖片及資料來源：每日郵報、BBC