問世間爐為何物，點解呢個世界上可以有咁多傻西瓜連微波爐同焗爐都唔識分㗎？

話說，有位天才老公朝早起身諗住整兩塊蒜蓉包做早餐。嗱，蒜蓉包嚟講，即係就咁將啲蒜蓉醬搽上塊包度再拎去焗啦，應該都好簡單啫下話？點知呢位天才老公最後都係整到兩塊包成嚿炭咁喎！

冇理由㗎，唔通係個焗爐壞咗？於是呢位天才老公就走去同老婆投訴個衰焗爐搞到佢啲包fail晒嘞。之後老婆聽到就覺得好奇怪，明明老公焗咗啲包5分鐘咋嘛，應該唔會因為焗得太耐搞到間屋一屋都係煙㗎，唔通係老公較得個溫度太高？

老婆去廚房一睇……撞你鬼咩，呢個係微波爐唔係焗爐嚟呀老公！

唉，連微波爐同焗爐都未識分，你以後仲點面對啲仔女呀！真係難為老婆一開始問老公係咪肯定自己用緊焗爐嗰陣，老公仲超有自信咁話「拜託不要當我是小孩好嗎」……

嗯，多得呢位天才老公，老婆又可以有多個買過隻新碟嘅理由喇，真係多L謝呀！最後呢位老婆表示，為咗屋企嘅安全著想，以後佢會喺廚房啲電器上面寫返張字卡㗎喇，55。

（弱弱一提，呢隻膠碟好似都唔入得焗爐㗎啵…）

資料來源：kakadoo／ptt