要做超級英雄，真係好唔容易㗎！成日都要拯救世界，廿四小時on call，冇OT冇補水，啲咁高危嘅職業仲要冇保險肯包?呀陰公。其實要保護地球，打反派都唔係最難，要你哋班人愛護地球先係最困難呀！你哋啲人成日將啲垃圾亂掉，又唔分類，連復仇者聯盟都忍唔住要出手喇！

今堂就係要教大家回收鋁罐，鋁罐呢家嘢，好多人都淨係掉入個回收箱就算， 掉嘢點可以咁求其㗎！專業啲，整扁個罐先得唔得？好似燙斗俠a.k.a. 挨人Man咁，做一個負責任嘅男人，最緊要夠硬淨！立即撞凹亦得～得咗。咁犀利，不如改名做「呀路mini淫Man」啦！

呢個世界笨唔係下下話硬就大晒嘅，軟都有軟嘅好嘅～好似蜘蛛絲咁，柔軟得嚟又堅韌就啱晒啦～一紥一揈咁就可以掉入回收箱喇。

見到你哋咁勁，變形俠醫又點可以輸呢，一於起雙飛，一次整兩個！但係Hulk哥呀，而家係叫你整凹個罐，唔係打穿佢喎⋯⋯

你哋班回收者聯盟好叻咩？超級英雄唔係得你哋幾個㗎！你當正義聯盟死㗎～而家終於知道超人同蝙蝠俠點解會反面喇，超人你又係嘅，雖然係人都知你天生神力，但係你都唔使咁一腳踩扁個罐嚟落Batman面㗎？人哋Batman係咁揼都係凹得嗰少少，已經好慘慘豬㗎喇。

其實Batman你咁有米，又使咩揼得咁辛苦吖，一架蝠蝠車碌過去咪得囉，再唔係叫阿福幫你研發件專係揼凹個罐嘅武器咪得囉，反正有錢就是任性吖嘛～

封面圖片及資料來源： hotkenobi／twiiter