2017年02月13日 星期一
【去死去死團出動】日本有遊行話要粉碎情人節！
各單位留意！聽日就情人節喇，淨係上網呻冇拖拍做keyboard fighter 有鬼用咩！距離呢個荼毒青少年心智嘅日子愈近，就愈要將行動升級，好似噚日咁呀，日本就有班叫「革命不受歡迎聯盟」嘅友仔搞咗個遊行，話要粉碎情人節喇！
噚日係禮拜日，你班廢青仲匿喺被竇一邊碌女神挨豬一邊唉聲嘆氣仲要唉唉下瞓著埋嘅時候，人哋已經站出來喇！
呢個粉碎情人節遊行已經係第11年舉辦，最大目的係要點醒世人，話畀佢哋知，情人節只係商家佬諗出嚟嘅賺錢把戲！
仲有呀，日本好鬼興喺情人節送朱古力表白㗎嘛，見人送我又送，見到人有我冇又唔開心，幾咁膚淺！呢班遊行人士就話你知，朱古力就係朱古力！係糖分！唔係愛呀懵佬（ok，懵佬係毛毛自己加嘅）！
收到成個櫃桶都係朱古力好威威咩？睇唔睇到牌上面寫住「朱古力嘅數量≠人嘅價值」呀？呢啲牌，呢啲標語，雖然冇乜親切感，但一眾單身狗都一定覺得好有道理！毛毛高度推薦畀咁多位聽日準備過懲人節嘅朋友呀！
封面圖片、資料來源連結：huffingtonpost.jp、youtube
《關注毒L人權系列》
【仲請唔請人？】日本餐廳為咗員工著想 連續三年平安夜唔做情侶生意
