單身狗那個不能說嘅日子又出現喇，即係又要戴頭盔，吖唔係，係要戴黑超嘅日子又到喇。明明只係想一個毒L靜靜哋對住個Mon，點解仲要睇住你哋啲人放閃晒恩愛吖！唔通嗰日真係想碌下Facebook同Twitter都唔得？

咁又唔使咁絕望嘅！日本最近興一個App叫「Toiletter」，icon成個馬桶咁，唔通連Siri都有嘢屙？原來呢個App係畀你連落Twitter度等你可以hide咗啲令你眼冤嘅post㗎～唓，咁有咩特別啫？就係特別在你可以親眼睇住呢啲post被水沖去喇！

開咗個Toiletter，就會見到有個座廁掣喺每個post嘅下面，無論係Ex（如咁好彩有）嘅証明而家生活得幾好嘅相，定係腦細同事旅行晒命文，只要一㩒，就會沖落廁所入面，等你唔使再喺自己twitter版面見到佢喇～

最正就係望住個post一路旋轉跟住個水流沖入廁所窿變到愈嚟愈細，真係突然覺得心都涼晒，有咗呢個App咪就算有幾多放閃相都可以將佢哋一嘢沖晒落廁所囉，爽呀！溫提大家，呢個App係免費嘅，每沖兩次水就會彈一次廣告，但係只要㩒一次廣告條link，之後廿四小時都可以任沖，將所有傷心事都一次過沖晒佢，過左嗰日之後咪又係一條好漢囉～老老77，可唔可以快啲出埋Facebook版呀⋯⋯

封面圖片及資料來源：VWI9u／twitter