2017年02月13日 星期一
【喊出嚟】地震搞到啲書冧成咁叫人點執呀？
小學嘅時候，老師成日話香港係一片福地，毛毛都唔係幾明㗎，不過睇到其他喺地震帶嘅地方有幾危險，就突然覺得自己身在福中喇。早兩日高雄發生地震，仲要喺凌晨時分先嚟震，嚇到唔少民眾個心都離一離。
發生地震之後，梗係要第一時間睇睇身邊人有冇事同埋喺facebook同大家報平安啦。有個網民就post相話自己同老公都安全冇事喇，睡房都冇乜影響，點知睇睇另一間房就知道出事喇……「呀！我啲書呀！！！」
哦，冇嘢嘅，唔使驚，啲寶貝珍藏漫畫完仲整無缺喺度，一頁都冇少到喎，不過係成棟成棟咁冧晒之嘛……
話時話，你肯定呢度真係你屋企，唔係二手書店呀？唔好趁地震混亂就想霸咗人哋間舖話係自己書房好喎……（喂借本Angel Heart嚟睇下得唔得？）
唉，凌晨發生地震之後，氣象局仲話嚟緊兩星期都可能出現餘震，叫大家要小心喎。咁點呀，即係執唔執好呀？一陣疊返好啲書之後又震到冧晒咪好蝕？但係由得啲書保持咁樣樣嘅話，個心又唔係幾舒服，叫人點做好喎……
唔使咁煩嘅，你見唔見到道門呀，一嘢閂埋佢咪冇眼屎乾淨盲囉。（如果你閂到嘅話）
封面圖片、資料來源連結：郭婉婷
延伸閱讀：
