想當年睇電影見到哥哥拎住支煙仔，不羈咁一吸一呼，成陣浪子味出晒嚟，唔好話女仔呀，連男仔見到都畀佢迷住呀。仲有呀，見到志明同春嬌因為喺後巷打邊爐而認識仲經歷咗咁多嘢，真係好想即刻學食煙識返個女朋友囉……喂喂喂，拍戲㗎咋，睇戲覺得食煙好正，係因為你唔係睇緊4D電影，聞唔到陣味吖嘛，想像下如果你另一半有吸煙習慣，搞到你成日要食二手煙，會幾唔舒服呢！

想另一半戒煙，淨係播正苦啲宣傳廣告冇用㗎，日播夜播都聽到麻木晒啦，不如試下花少少心思感動佢啦！例如靜雞雞喺每支煙都寫句鼓勵句子，甚至刻毒涼薄嘅嘢啦，darling見到你咁可愛嘅字跡，癮起嘅時候實會停一停，諗一諗嘅～

如果呢招試過都唔work，就要將行動升級，由文字升lv做視覺衝擊喇！趁情人節，反正都係要送禮物，不如就整佢個肺啦！唔好誤會毛毛爆粗呀，係講緊整呢款成個肺咁樣樣嘅朱古力畀佢呀！嗱，左邊粉嫩粉嫩嘅就係健康肺，成個瑞士山區肺咁㗎。而右邊灰灰黑黑仲有一點點嘅，咪吸煙人士個肺囉。粉紅色膝頭就話可遇不可求啫，想要粉紅色肺肺，戒煙啦。

特登分別用士多啤梨味同芝麻味嚟整健康肺同食煙肺，呢個妹豬真係夠晒心思呀，計毛毛話收到千祈唔好食，擺喺枱頭用嚟警醒自己就啱晒！另外幾款朱古力，最好就係用嚟話畀自己知，食煙唔止對個肺唔好，對身體其他器官都一樣有害㗎！

收到咁有心思嘅朱古力，真係送返咩物質畀人都唔夠班㗎喇，戒煙應該就係最好嘅回禮喇。

バレンタインだから、健康な肺と喫煙者の肺のチョコ作ったよ！
煙草やめようね！ pic.twitter.com/bVuO2TWaN8

— アマミノカヤウサギ@じゃぱりぱーく (@kaya_usagi) February 13, 2017

封面圖片、資料來源連結：kaya_usagi／twitter

延伸閱讀： 【係愛呀！】女友為幫男友戒煙畫到包煙咁樣樣