咁辛苦先捱得過親戚批鬥大會，話咁快又要面對懲人節嘅無限閃光彈，有冇諗過單身狗嘅感受呀！不過對於大小商店嚟講，老闆就算單身又點喎，呢個日子有無限商機，只要黐返個情人節限定嘅label，呢日咩都可以賣貴一倍呀！其實有錢賺，仲使擔心有冇女咩～

老老77，賺錢還賺錢，畀返少少商業道德嚟好喎，一個包夾住一塊現成朱古力就叫情人節限定商品？會唔會hea咗啲呀？

你而家咩態度先，話你兩句就發脾四咁話喇喎，夾多幾塊朱古力落去就算喇？腦細就話唔係～佢嘅意思係想講朱古力係代表愛呀嘛，咁呢個夾咗五塊朱古力嘅包咪代表好有愛囉。睇到呢五大塊朱古力，已經感受到份愛係幾咁heavy喇⋯⋯嗯，你話係咪係囉。

原來呢間叫翠玉堂嘅日本嘅麵包屋都唔係第一次推出啲咁破格嘅應節包㗎喇，啱啱過咗無耐嘅節分，佢哋仲推出咗豆全部都係豆嘅包?。喂老闆，節分係叫你趕惡鬼，唔係趕客啵～不過係腦細心目中，可能班麻煩客仔仲惡過鬼呢～

仲有呢個成人禮20歲限定嘅包，就係夾住舊日本酒蒟蒻，加塊魷魚乾⋯⋯呢個明明就係大叔口味麵包嚟㗎啦！

其實又唔係個個節日限定包都咁伏嘅，起碼聖誕嗰個係夾住咗原隻雞髀吖～況且人哋個朱古力包又冇話一定要即刻食，識食就梗係放入焗爐，等朱古力融入個包度，個包烘到又卜卜脆、熱辣辣先食㗎啦～咁易整，就算係地獄廚神都整到喇，如果有妹豬整唔切禮物，不妨試下呢招吖，人哋日本限定都係咁咋嘛！

封面圖片及資料來源：翠玉堂／twitter