自從出咗Pokemon Go，寵物小精靈就變咗老是常出現嘅標準item，無論係聖誕節買禮物，行年宵市場，定係元宵節睇花燈都見到佢哋呀！不過人怕出名豬怕肥，一出咗名就會有好多山寨貨出嚟，最慘係搞到正版嗰個形象崩壞呀！

話晒見過下世面，呢隻比卡超，嚇我唔到嘅，打咗Botox瘦面啫！咪以為我睇唔到呀，佢仲偷埋叮噹個百寶袋黐埋落自己度?！可能你覺得冇咩嘢啫～梗係啦，呢個只係level 1咋嘛。

唔係個個瘦身成功都係好事嚟㗎，你睇下呢隻卡比獸，你學咩人減肥啫！原本肥嘟嘟咪幾得意囉，而家唔肥唔瘦，仲強行畫咗條粗眼線做咩啫，好好哋做返你嘅秦煌咪幾有前途囉！嗚⋯⋯還返個軟綿綿嘅大肚腩畀我呀！

呢隻火恐龍全身上下，最似樣嗰忽，就已經係碌嘢喇⋯⋯講緊係頭頂個碌好似角咁嘅嘢呀！你話呀除咗呢忽仲有邊忽似先得㗎！

「還返小智畀我呀pika！」

嘩！嚇死人咩，真係心都離一離呀，第一隻比卡超已經離晒大嫂㗎啦，同場竟然仲有隻進化失敗嘅屍殺版呀！你睇佢個樣幾咁猙獰，幾重怨念，仲要冇下半身，望落好似喺個墳墓度爬緊出嚟咁呀！佢仲伸手出嚟，想拎個精靈球，而精靈球入面，竟然係精靈蛋呀！原來精靈蛋係喺精靈球孵出嚟嘅，長知識了！如果畀小智見到比卡超咁嘅樣，應該以後都瞓唔著⋯⋯

封面圖片及資料來源：Chen Sheng