無論大人定細路，睇牙醫都有一種莫名嘅恐懼。特別係當你要剝牙，就算局部麻醉咗感覺唔到，但對眼都仲睇到支嘢插入你個口度攪下攪下，耳仔都仲聽到啲滋滋聲㗎嘛，你都咪話唔驚！最緊要係你就算喺心入面喪背乘數表都分散唔到注意力，唯有全程眼甘甘咁望住牙醫拎住佢碌嘢喺度蹂躝你⋯⋯

嗱嗱嗱，今時今日咁嘅服務態度係唔夠㗎！英國有位靚仔牙醫就知道病人嗰種肉隨砧板上嘅痛苦，所以決定喺自己診所加返啲嘢等病人整牙都有返啲樂趣喇～呢幅圖遠睇係咪好熟口面呢？不過唔係歐洲教堂啲壁畫啵！

咁近知係咩喇啩～咪就係大家小學喺圖書角爭住借嚟玩嘅《威利在哪裡》囉！當牙醫同你玩緊蛀牙在哪裡嘅時候，你就搵下Wally喺邊度，咁大家各有各玩，做病人嘅咪唔使咁慘囉～只係搵唔到都冇得叫牙醫幫手咁啫～

不過有人表示，其實到整牙嗰陣大大盞燈照住你，鬼睇到咩～或者真係睇到呢，不過如果搵到之後，下次再嚟咪冇嘢搵囉？睇嚟牙醫哥哥以後都要keep 住換天花板張圖喇。換個角度睇，話唔定有啲人搵唔到，會特登嚟洗牙再搵過呢！

毛毛都知你哋啲人實會搵埋一份㗎喇，唔使睇得咁辛苦喇，畀張原圖你慢慢搵啦～搵到未呀？嗰度呀，嗰度呢，著紅白間條衫帶眼鏡嗰個呀！

封面圖片及資料來源：Boredpanda