講起鵝，肯定個個第一時間就會諗起深井燒鵝啦～咁又係嘅，喺香港有幾可會睇到隻生勾勾嘅鵝喺你面前行嚟行去吖～喺外國就唔同喇，好容易會喺見到啲天鵝一雙一對咁，真係眼都冤呀！但係愛爾蘭有隻天鵝唔知係咪做錯嘢被鵝飛，搞到唔止迷失喺愛情遊戲入面，仲迷失埋喺條馬路邊呀！

正所謂，馬路上，車子多，很難過。當難過嘅鵝鵝遇上條咁難過嘅馬路，點返去馬路對面條河呀？好彩有個暖男哥哥見到鵝兄咁sad，怕佢睇唔開衝出馬路做傻事，所以企喺隔籬睇實佢啫～

「鵝兄，留得青山在，哪怕冇咸書呢，我咪又係單身狗一隻……」

「我啲咸書畀個EX燒L晒啦！我鵝生仲有咩意義呀！呀－！！！」 

哎吔！今次弊喇，唔小心篤中咗鵝大哥嘅痛處，搞到佢衝咗出馬路呀！

好彩暖男哥哥一個箭步行出馬路cover鵝兄，啲司機嗱嗱臨停車，鵝兄先唔使rest in pieces咋！鵝兄，有事慢慢講呀，使乜咁睇唔開呀？咸書呢家嘢，而家上網有得睇㗎喇。

呢位仁兄唯有一邊安慰天鵝大佬，一邊護送佢過馬路啦，仲指埋條路，話佢知點樣行返屋企?～但係啲失戀中人又邊有咁聽話㗎，等你擰轉背，佢咪又係走返轉頭，再唔係咪借酒消愁囉。

護鵝哥你咪送佛送到西，幫幫忙趕埋隻天鵝返落河囉，於是一人一鵝就係咁樣行落河邊，你又陪下我，我又陪下你，咁陪陪下會唔會產生感情㗎～

送君千里，終須一別，喺呢個河邊佢哋要分手啦！以後你有你嘅生活，鵝有鵝嘅忙碌。希望下次偶然遇見唔會喺係中國餐館嘅餐枱度啦⋯⋯

「雖然又要分手，但我唔會喊㗎！」

瀟灑嘅天鵝就咁跳咗落河，返去屬於佢嘅地方喇～好心真係有好報嘅，護鵝哥呢件好人好事畀人喺網上瘋傳，一夜爆紅，個個都pm佢話想聽下呢個男人與鵝嘅故事呀！入面唔知有幾多個係女女呢？毒L們，下次喺路邊見到麻雀仔就識做啦！

封面圖片及資料來源：the Dodo