執屋雖然叫做執屋，不過毛毛懷疑執緊嘅其實係自己嘅回憶同思緒囉，喺櫃桶深深處搵到本紀念冊，逐頁慢慢睇，先醒起以前原來有過呢幾個同班同學，跟住喺床下底又執到隻公仔，先諗返起送佢畀你嗰個ex……樣樣都咁多回憶，叫人邊捨得掉咗去呀！

仲有呀，啲雜物擺五年十年就話係舊嘢啫，畀啲耐性同堅持，忍夠廿幾三十年唔好掉佢，就可以由夜冷貨升格做古董㗎喇！日本有個網民就話佢大掃除嘅時候，竟然摷到罐舊罐頭！哦，發明罐頭就係為咗可以延長食物保質期吖嘛，擺得耐都好正常啫～

食得唔好嘥，睇下罐罐頭過咗期未先，執屋執得咁辛苦，加餸慰勞下自己都好應該啫。咩話，我冇睇錯下話？19……88？呢罐三文魚嘅生產日期竟然係1988年？即係個網民兩歲嗰陣，呢罐罐頭已經出世喇！

誰說～時間片刻～變陳舊～1988年？之前有個網民喺屋企連昭和61年（即係西曆1986年）嘅蟹罐頭都搵到呀，大你兩年！擺咗咁耐，會唔會長腳蟹都變臭蟹㗎？罐頭嘅價錢，就食到紅酒嘅味道，抵到爛呀，一於去買多幾打罐頭返屋企擺，留畀個孫做傳家之寶啦！

今回の大掃除でとうとう最高齢食材見付けた・・・製造1988年、俺が2歳の時の鮭缶。「原産国 ソ連」の文字に震えるw pic.twitter.com/q8vyGOeqLA

— 五月雨せつな@単行本作業中 (@takaflo) February 15, 2017

封面圖片、資料來源連結： takaflo／twitter、eternal2001／twitter

延伸閱讀：
【出土文物？】被時間遺忘嘅自動販賣機

【回到過去】居然畀我喺阿婆個喼度搵到支70年代嘅牙膏呀！