有好多貓貓同狗狗都好鍾意自動吸塵機，因為喺佢哋嘅眼中呢部笨唔係吸塵機，而係座駕呀！只要一坐上去，部吸塵機就會自動帶主子喺間屋度周圍行，見到牆又識自己轉彎，真係啱晒出巡用呀！有咗佢仲使乜要奴才帶主子行街喎～奴才退下啦，冇你嘅事喇。

不過今次聖上自己一個出巡就出事喇！聖上好似平日咁坐上咗佢嘅座駕，準備去廚房睇下罐罐嘅儲備夠唔夠，點知部吸塵機竟然一直向住個櫃行唔轉彎喎！喂，吸塵機你自己有路行啫，都要顧下上面嘅主子㗎，主子，睇L住呀！

今次真係智能叛變喇，反喇反喇，部座駕竟然帶主子撞埋個櫃度，枉主子咁信任你，去到最後一刻都信你會改⋯⋯行第二條路，就嚟撞到埋去主子都唔跳車，但你竟然出賣佢？而家痛嘅唔止主子個頭，仲有佢個心呀！

「我個心⋯⋯好似穿咗個窿呀⋯⋯」

睇嚟主子今次真係受咗好大打擊喎，攤咗喺地下郁都唔郁，望住個部離佢而去嘅自動吸塵機，主子嘅背影仲散發住淡淡嘅哀愁?⋯⋯聖上唔使咁傷心喎，奴才對你永遠忠誠㗎，你想去邊咪叫奴才帶你去囉～

封面圖片及資料來源：大鍋只是喝醉／微博、阿中阿中