第一次上朋友屋企，去到門口都會有少少緊張，一嚟怕摸錯門口，二嚟一去到嗰個毛文就要面對人生一個好重要嘅抉擇⋯⋯除唔除鞋好呢？不過仲係會有啲豪邁嘅朋友，明明門口成堆鞋，都係諗都唔諗就9衝入嚟，主人家都唔知阻唔阻止你好呀。

外國呢個妹妹就乖到不得了，由細到大，媽媽都教要除鞋入屋，無論自己同人哋間屋都唔應該整污糟㗎嘛～不過佢唔止自己返屋企會除鞋，就連Barbie返屋企都幫佢除埋鞋呀，事關妹妹話唔想Barbie整污糟間Dream House咁話喎……btw 你都冇買條街畀Barbie行，佢邊有得整污糟個鞋底啫～

唔止除鞋咁簡單，佢仲幫Barbie同阿Ken將啲鞋排到整整齊齊放喺門口，細細個就咁賢良淑德，大個仲得了嘅？作為家姐嘅見到個妹有咁特別嘅癖好，就諗住出賣細妹上Twitter，呃like之餘乘機恥笑下佢啦～

點知大部分人都係讚妹妹好有家教，年紀小小就有咁嘅堅持，真係巧打耳呀～搞到家姐個恥笑大計完全失敗，阿妹喺呢場姊妹大戰贏咗漂亮嘅一仗呀！但係講到尾，咪又係因為妹妹本身就咁卡哇依，所以你哋班人先覺得咁樣係可愛咋嘛。如果毒L做一樣嘅嘢，肯肯定畀你哋班人話係怪叔叔啦！

封面圖片及資料來源：ivaayz／twitter

my little sister got a barbie dream house N HER ASIAN ASS MAKES ALL THE BARBIES TAKE OFF THEIR SHOES BEFORE ENTERING pic.twitter.com/vBMWXaRSyC

— ivy (@ivaayz) 2017年2月12日