近排天氣開始回暖，又落毛毛雨又大霧，唔講都知春天已經偷偷地嚟咗啦～日本Starbucks都出咗春季限定嘅櫻花系列呀，日本喎！咖啡喎！櫻花喎！粉紅色喎！一聽到呢堆字，妹豬都已經發晒癲想即刻飛過去飲返十杯八杯啦！點解香港冇份㗎，公平咩！

如果真係拎到假又搶到平機票去日本，點止要飲櫻花系列咖啡呀，更加記得要去Starbucks「大塚駅前店」朝聖，欣賞下呢幅喺咖啡店嘅黑板畫呀！黑板上面畫咗promote緊嘅櫻花系列咖啡，再加埋粉粉嫩嫩嘅花瓣背景同埋只有高手先寫到嘅字體，淨係睇畫都已經感受到份春意呀～

原來呢個黑板畫神人係一個90後男仔嚟，幫過Starbucks畫黑板畫好多次㗎喇，佢嘅櫻花咖啡畫畀人瘋狂些牙之後，佢仲post埋自己上年嘅作品出嚟畀大家慢慢欣賞?～除咗嘩、嘩、同埋嘩之外，毛毛已經畀唔到任何反應……

天呀，點解日本可以連咖啡店幅黑板畫都靚過人㗎！不過咁啵，你畫得咁完美，咖啡師都好大壓力啫，一陣杯實物同你幅畫差太遠點算呀？

封面圖片、資料來源連結：suagasawatora24／twitter