野生動物叫得做野生，好聽就叫天生天養，難聽啲講其實咪即係自生自滅，大自然出晒名適者生存，當你哋啲人類睇人玩Survivor 食花生食得咁過癮，一眾動物表示濕濕碎啦～佢哋唔止日日都玩緊呢個遊戲，仲要一輸連命仔都冇埋㗎！

但係就算幾努力不懈最後生還，如果冇水冇嘢食，再威猛嘅動物都係會死㗎。人類呢幾年仲要搞到氣候反常，好多地方都出現乾旱，啲動物點頂呀！好彩有個好心人，見到啲動物撲水撲得咁辛苦，所以日日都揸車運水去啲乾咗嘅水塘度呀！

呢個好心人叫Patrick，話說佢發現肯亞有個杳無人煙嘅國家公園，周圍乾晒塘，加上天氣keep住咁dry，如果冇人類幫幫手，喺嗰度住嘅動物實渴死啫！國家公園點解會冇人？傻豬嚟嘅，你見香港除咗要畀錢嘅公園，啲國家級乜乜公園幾可有人去吖？

於是佢就日日揸住架運水車，帶住三千加侖水去拯救嗰度嘅動物，非洲最多係咩呀？唔係動物係沙呀！揸架咁重嘅運水車，火舞黃沙咁衝呀衝，普通人揸架越野車都未必頂得順啦。但係有咁多水牛、斑馬同大笨象等住佢，Patrick哥又點捨得令啲動物失望呀，就算揸到黑都天埋都要照去！

Patrick哥仲會抽時間去啲小學，同小朋友開心share下佢而家搞緊啲咩，同埋教佢哋點解要保育啲動物，真係愛心爆棚呀！

有啲人可能會覺得動物嘅生命冇人類咁重要，但其實生物鏈環環相扣，啲動物死晒你估人類又有運行咩？所以毛毛一向都好支持愛護動物㗎，不過識飛嘅小強除外咁啫⋯⋯

封面圖片及資料來源：the Dodo