香港人食薯片有特別多方法。有人就咁用手拎嚟食，有人拎筷子夾嚟食，仲有人會用嚟點汁或者夾其他嘢一齊食，但係無論點食，大部分人買薯片嗰陣都會揀包靚仔啲，冇咁碎嘅。而好多生產商仲知你哋唔鍾意啲薯片咁碎，所以用心良苦咁贈送咗大量嘅新鮮空氣畀大家，唔止防撞，仲可以當水泡用?！

不過美國有間公司居然反其道而行，唔止唔怕啲薯片壓碎，仲要係特登將啲薯片碎上喎！正所謂，唔怕生壞命，最怕改壞名，個產品名仲要好改唔改叫「Fail」。有冇人會特登畀錢買啲Fail嘅嘢呀？

所以話，創意嘅嘢，你識條薯咩，諗呢個idea嘅人話，平日啲薯片太大塊，拎出嚟搞到隻手油冧冧又唔可以一啖食晒好麻煩喎，所以就諗到將啲薯片壓碎再入袋，你只要摵開個袋角就可以一嘢倒入個口度食，爽呀！佢哋話通常啲薯片細塊啲，仲會入味啲?呀！

呢款薯片由2月6日開始就喺美國各大酒吧有售，喺酒吧賣都好嘅，有時喺酒吧度整污糟咗啲手指，之後會好唔方便㗎嘛，55……講緊唔方便用電話抄人牌呀。你問咁同喺超市買一包普通薯片搖碎佢有咩分別？個內容物誠實啲咁囉，人地話到明叫Fail，就算空氣含量多定少都冇得怨啦。

封面圖片及資料來源：OddityCentral