人類除咗總係要犯同樣嘅錯誤之外，仲有好多天性係忍唔到嘅，例如見到啲掂完會有反應嘅嘢，好似怕羞草、蒲公英之類就好想玩，睇到啪啪紙就會莫名想㩒嘅衝動，見到軟綿綿嘅嘢就會想捏⋯⋯但最容易出事嘅莫過於見到窿就想插喇！

古乳有暈，最安全嘅地方就係最危險，通常一個人瀨嘢，唔係做啲肯肯定出事嘅嘢，好似插隻手指落電器插座呢類，而係插入啲你以為點樣出出入入都冇事嘅地方吖⋯⋯

好似呢位台灣網友咁，行行下街喺鋪頭度，望住碌麻繩有個咁熟悉嘅窿窿，就有股衝動將身體嘅某長形條狀物插入去喇，就係佢個隻中指喇！點知一插一掹，成條⋯⋯紙筒卡喺隻中指度拉埋出嚟呀！

網友點掹都好，個紙筒都掹唔到出嚟，搞到隻中指好似打咗石膏咁呀！叫咗你平日唔好舉咁多中指㗎喇，而家隻中指粗壯得滯，掹唔到出嚟喇，係咪衰呢？

最慘嘅係個紙筒真係真材實料有保證，又厚又硬，一啲唔似平日廁紙入面嗰啲一㩒就軟嘅質地，無論網友用鎖匙撬定係用腳踩都好，個紙筒用生命力硬接完，都仲喺完美咁包住隻中指呀。

最重要嘅係⋯⋯佢未畀錢。於是呢位網友唯有形跡可疑咁收埋隻中指，跟住畀錢買咗卷繩，但佢又唔敢問店員借較剪喎。所以，佢唯有帶住手套全程舉住隻中指咁揸電單車返屋企搵老竇求救喇。而可憐嘅中指最後喺老竇嘅救援底下都成功逃脫喇。呢個故事教訓我哋，嘢可以亂食，窿不能亂插呀同學。

封面圖片及資料來源：nifa/PTT