有人話貓同女人一樣，都係咁需要人氹，妒忌心一樣咁重同咁易呷醋。所以如果想知道女人有幾變幻無常，你試下對住喵星人一排，就會好快明白㗎喇。不過估唔到佢哋唔止性格似，就連爭仔打架嘅方式都咁似呀！女人嘅鬥爭你平日睇啲深宮電視劇睇得多，今日帶你見識下喵皇嘅爭寵方式！

皇后！邊個將你蹂躝到人唔似人，成個伽椰子咁款呀，你係咪撞到貞子同佢開拖呀？等我神探毛毛幫你搵出真兇喇～

以毛毛9估開嘅偵探頭腦，側邊嘅天皇乜事都冇，皇后又衣衫整齊，即係唔係垂涎皇后嘅美色想侵犯佢啦，加埋兇手專攻皇后嘅頭髮，咩人打架最鍾意扯頭髮呀？咪女人囉，兇手一定係一名年輕女性，呢宗一定係感情糾粉！

所有謎底已經解開啦，原來兇手係你！冇計啦，貴為主子，又係一名女性 ，有咩理由唔係呢間屋嘅皇后呀！點可以畀另一個女人坐咗佢皇后個位㗎，而家仲要係行一夫一妻制?，如果嗰隻公仔係皇后，咁你當主子係咩呀，你講吖！

其實後宮鬥爭，又點會冇蛛絲螞跡㗎，喺冇幾耐之前，就已經發生過一單高空襲擊案㗎喇，皇后受襲，搞到頭都甩埋，幾乎要做無頭東宮呀，好彩皇后命不該絕，係個髮型潮咗啲咁囉。但係奴才都仲未醒水，畀主子純情嘅外表呃咗，以為皇后真係唔小心撞到，列做意外處理呀！

所以話，做奴才嘅最緊要就係挑通眼眉，唔好捲入呢啲權力鬥爭入面，見到主子睇邊個唔順眼就好醒目將佢哋兩個隔籬喇，如果唔係，小心下次甩頭甩髻嗰個就唔係個公仔，係你呀貓奴。

封面圖片及資料來源：TiKuBi_girl／twitter