作為一個hea爆嘅學生哥，好多時作文嗰陣都會遇到唔夠字數呢個問題。唔想作文唔夠字數？哦，好簡單啫……要舉例嘅咪舉多幾個例，要形容嘅咪用多幾個四字詞嚟形容囉～四一如四，四四一十六，吹下吹下就吹夠字數㗎啦！再唔係嘅，好似以下呢位台灣同學仔咁又得！

話說，最近有台灣網民同大家開心些牙咗一份疑似係某位同學仔嘅作文試卷。喺相入面我哋可以見到，呢位同學仔寫咗篇以《從那一刻起，我瞭解了……》為題嘅文章。咁到底文中嘅主角了解咗啲咩呢？冇錯，答案就喺第二段！

「……我就了解到了原來老鼠生活是這麼的簡單每天只要吱吱吱（下省N個「吱」）……」

唔L係呀，呢位同學仔竟然寫咗280個「吱」字？而且呢頁都只不過係第一頁嚟，句句子都仲未完……喂老老竇竇，你驚篇文唔夠字數都唔使咁呀嘛？

between，其實計毛毛話，呢位同學仔邊係想hea字數啫，人哋都係想表達老鼠嘅生活到底有幾簡單咋嘛～你哋話嘞，除咗個「吱」字之外，仲有其他更好嘅字可以用咩？老師你唔係咁都唔知呀吱吱！

資料來源：李建民／爆笑公社