揀旅行地點嚟講，除咗要睇遠唔遠、機票幾錢、啱唔啱玩之外，仲要諗埋溝唔溝……通到㗎！好似第一次自遊行，咪去台灣囉，又近又有正體字睇，實冇死啦！Level 2，可能就係去日本喇，雖然冇中文，不過都叫做有幾隻漢字吖嘛，估估下都唔會差得去邊嘅，點都易睇過韓文吖。

好彩而家日本好多地方都有埋英文告示咋，咁咪方便得多囉！好似JR富良野站就有塊英文告示喇，一齊睇下佢講乜先～

Thank you very much can not use an IC card by furano station？哦，即係「JR富良野站唔用得IC卡，好很多謝」咁囉，不過用咗倒裝句啫～

咦唔係啵，原來最尾仲有個「very much」……嗯嗯，日本人有禮貌就全宇宙都知啦，佢都係想你就算齋睇字都感受到佢有幾感激你啫！

睇埋隔籬呢版先，You can not a IC card by furano station…… 嗯嗯，佢都係想講多次呢個站唔用得IC卡啫，一睇就明啦！第二句，Also IC card charge also unavailable……嗯嗯，一句入面有咁多also，以前會考小組討論嘅回憶即刻返晒嚟呀！至於下面兩句呢……算啦，毛毛都攰喇，唔該你哋幫幫手翻釋啦好嗎？

毛毛終於明點解港鐵咁大間機構，張英文告示會寫到咁樣樣喇，原來佢都係想冇錢去旅行嘅香港人搭火車地鐵都有去咗日本玩嘅感覺啫！

ここまで酷い英語は見たことがない。(2017.1.5富良野駅) pic.twitter.com/mnXxRDywWA

— まる(鉄道アカウント) (@trainjrhokkaido) February 22, 2017

封面圖片、資料來源連結： trainjrhokkaido／twitter、曾欣欣 Gloria