現時地球上最大嘅族群，可能就係低頭族，一行出街就會見到，無論等緊車定迫緊巴士、等緊位定食緊開年飯，十個有九個人都頭耷耷撳緊電話。有人話smart phone拉遠咗人與人之間嘅距離，但都有人覺得方便咗同朋友保持聯絡，而對呢個網民嚟講，更加有一種特殊意義。

咦，點解呢個line對話淨係得一個人講嘢，另一邊完全冇回應，仲要連「已讀」都冇嘅？你可能會以為又係一個痴心兵仔纏住娘娘嘅故事，但其實真相更加令人傷心。

呢個網民嘅好朋友已經過咗身半年，但佢依舊send message畀對方，不時同對方分享生活點滴，講下自己嘅近況，就好似當對方從來都冇離開過，只係一時唔得閒回覆咁……

有人用send message呢個方法去思念一位好友，亦有人用另一個好特別嘅方式去懷念佢嘅摯愛。英國有一個21歲嘅男仔因為癌症離世，佢嘅爸爸媽媽準備咗呢副鮮黃色嘅Lego棺材送別佢，除咗係因為囝囝生前最愛砌Lego，仲因為希望大家都記得囝囝樂觀積極嘅人生態度。

可能我哋都仲年輕，覺得「生離死別」四個字離我哋好遠，但人有旦夕禍福，一個意外就會令我哋同最愛陰陽相隔，希望大家都能夠珍惜眼前人。

封面圖片、資料來源連結：陳淑麗、manchester evening news