喺網絡上有某啲品種嘅狗狗係特別紅嘅，柴犬就係一個最好嘅例子喇～梗係啦～柴柴又活潑又貪玩，再加埋兩個軟綿綿好好搣嘅面珠墩，真係巧打耳呀！不過通常柴犬喺網上爆紅，都唔止係因為打耳咁簡單，而係佢哋成日做咗啲傻豬嘢畀主人恥笑呀！

好似日本網友養嘅呢隻柴柴咁, 主人諗住帶佢散下步喇，點知柴柴行到人哋屋企見到個fd就好興奮咁衝過去同人say Hi 喇。

「喂，黑仔，我哋以後唔好見喇，隔籬阿肥有樓有前途，我而家跟咗佢喇汪 ！」

「我汪你呀，話飛就飛，你當我係咩呀！」

嘩，原來唔係say Hi係掟煲呀！黑仔呀黑仔雖然佢畀綠帽你戴係唔啱嘅，但係你都唔可以咬佢㗎，話晒人哋都係女，畀返啲紳士風度出嚟，放口，放開所有啦⋯⋯

「嗚⋯⋯你唔好走啦汪 ，最多我今日?我主人買間屋畀我吖，我點都唔會放口㗎喇！」

正所謂，逝去感情如何留得住呢？黑仔你有型有款，實搵到第隻狗女嘅，你兩隻狗狗，喺單身狗主人面前拉拉扯扯，你叫主人情何以堪呢？

「啊－我個鼻假㗎，咬歪咗點算呀！你整到我好痛呀，我以後都唔想見你呀！」

無奈嘅主人除咗企埋一邊食花生睇戲，同埋用電話拍低呢套史詩式MK活地阿倫巨著仲可以點呀，始終，汪星人嘅感情世界，人類識條尾咩～

以上感情轇轕純屬虛構，如有雷同，家門不幸。

封面圖片及資料來源：shibawanko_yume／twitter