一講忍者通常一諗就係諗到火影，或者忍者亂太郎呢啲動畫，再唔係就係會諗到煙霧彈、隱身術同分身術之類。但係你又知唔知忍者最出名有邊兩派先？就係甲賀派同伊賀派喇～而作為門派嘅發源地嘅伊賀市同甲賀市，就梗係周圍都充滿忍者嘅氣息啦，但估唔到為咗宣傳，就連公務員都要瞓身演出呀！

你冇眼花，呢度成堆人都著住忍者衫，但佢哋唔係遊客著忍者衫嚟玩，係一班尊貴嘅議員呀！原來2月22日係忍者日，所以伊賀市就喺2點22分，召開議會，由市長發表忍者宣言，仲要議會上下一齊cos成忍者?！

市長果然係市長，連扮忍者套衫都型仔過人呀！仲要揸住咁大碌⋯⋯卷軸，成場仲有邊個夠你威呀，啲女都畀你媾晒啦～通過咗忍者宣言，影返張大合照先～嗱，伊賀玩到咁大，咁甲賀又點先？

你哋班議員都著住套忍者衫開會，咁做細嘅又點可以交行貨呀？喺甲賀市嘅一班公務員唔止著忍者衫返工做嘢著足全日，仲要唔止著一日，係忍者日嘅前二後二，即係五日都要扮成忍者呀！

睇電腦打下字就話冇影響啫，包到咁實仲講得到電話咁先犀利呀！但係如果要出去見客，會唔會嚇親人哋㗎？

有職員就接受訪問嗰陣話，扮咗忍者之後，做嘢都快咗呀！唔通扮忍者真係會識分身術，所以做嘢會快啲？咁就要日日著喇，個個都包到咁密實，咁女同事咪唔使煩點襯衫，男同事又可以專心做嘢囉！不過講到尾，其實腦細叫到你做嘅嘢，到你話唔好咩～

有啲嘢唔使講到出口嘅，睇下呢個表情，完全表達到打工仔嗰份由外至內再到返外嘅無奈，個內心戲強到呢⋯⋯

封面圖片及資料來源：朝日新聞、ppuripha／twitter、新浪新聞