成班Fd開P點可以冇Party Game玩㗎～而要數Party Game嘅經典，又點少得層層疊、鱷魚醫生同危機一發（a.k.a.海盜桶）呀？明明輸咗都冇咩嘢，但係一成大班人玩就會大家都突然認真起嚟，好似真係輸咗就會有生命危險咁！

鱷魚醫生同危機一發主要都係講機會率同運氣，個玩具咁細嚿，中招嘅機會率自然都大啲啦，所以可以好快就玩完一鋪～但係如果你玩嘅係呢嚿危機一發，除非你係行運超人啦，如果唔係，想一擊即中都幾難喇！

嘩，啲劍多到花都眼埋呀！呢個放喺日本Web Media Surprise Sale嘅係2400份之一機會中嘅危機一發，即係有成2400個窿咁多呀！如果次次都唔中，咪要插足2400支劍？嘩！咁玩一鋪咪天黑都未玩完？

雖然呢個桶望落好大碌，但係啲劍仔仲係同原裝一樣size㗎～唔好話搵邊個窿先係機關，要搵邊個窿未插都要花啲時間啦～仲要冇咁上下高都插唔到最上面啲窿呀！

正常呢個遊戲有兩種玩法，一種就係插中咗就輸，另一種就係插中先叫贏。根據國際慣例呢，咁贏就梗係有獎，輸就梗係有罰㗎啦～

而呢個加大版危機一發嘅玩法就係無論你中定唔中，都唔會空手而回，仲要免費任玩㗎！如果你插咗5支劍或者10支劍都冇中到，就會有份小禮物。咁如果插中呢？呢個2400個窿嘅危機一發連海盜公仔同啲膠劍就係屬於你㗎喇！主辦單位仲要驚死你會唔見啲劍，額外送多600支畀你?～係咪好意外，好開心呢！

最抵死嘅佢仲要寫明，插中咗係冇得唔拎返去㗎⋯⋯究竟呢個係大獎定大懲罰，毛毛真係睇唔透。但係呢碌嘢就吸引咗好多人懷住不同嘅心情嚟打大佬，而結果就係⋯⋯

畀右手邊呢個灰衫大叔插中咗呀！有圖有真相，佢就係畀黑鬍子選中嘅男人喇！你睇佢個樣幾開心，嗯，係開心嘅，好似係。唔知大叔會搬呢嚿嘢去邊呢？計毛毛話，其實呢嚿嘢最好就係放喺office嘅暗角，仲要黐埋腦細幅相上黑鬍子度，畀腦細插完，咪大大力插返隻公仔囉，咁就肯肯定夠晒減壓嘞！

封面圖片及資料來源：KottsmYamanashi／twitter、kokubucamera／twitter、togech_jp／twitter、Togech