一個人有空餘時間釣下魚，係Relax嘅，唔係某人又點會提議喺中環整個垂釣區，等大家食個lunch都要用45分鐘嚟釣魚鬆弛下呢？釣魚最慘唔係等極都冇魚，係你等咗好耐，滿心歡喜以為有魚上釣，點知竟然係一隻靴或者係其他垃圾，個心真係沉到入深海呀！

有日本網友去釣魚就見到另外一種慘況⋯⋯就係呢隻可憐的小小鳥喇，本來佢應該地闊天高任鳥飛嘅，點知就係啲冇手尾嘅釣友將啲魚絲周圍掉，搞到呢隻雀仔畀啲魚絲撟住晒啲爪，唔止飛唔起仲死咗喺度呀！

係咪覺得呢種雀好熟口面呢？上次有隻翠鳥變咗急凍鳥，呢隻係同佢好似樣嘅藍磯鶇呀～兩隻都係想飛入個湖到搵食，點知一樣中咗伏，真係冇陰功呀！冰封鳥就話係因為大自然嘅威力啫，但係魚絲就好明顯係人為問題啦！

所以網友PO出嚟就係想提醒大家，唔好諗住掉玻璃樽、膠樽同膠袋呢啲先叫亂拋垃圾，其實一條魚絲都已經可以對生態造成好大破壞㗎喇。正所謂，自己垃圾自己收，去釣魚定畀人＿，有時真係只差一「線」㗎咋，乖喇，去得釣魚就自己收線啦好冇？

封面圖片及資料來源：hoya_japonica／twitter、每日郵報