如果結婚係愛情嘅墳墓，咁離婚咪即係復活？咁講法，睇嚟識揀一定揀喺復活節離婚喎，55，夠晒應節呀嘛。而話晒復活咁大件事，係咪點都應該做返場儀式賀一賀……i mean做返場儀式嚟幫自己療一療傷呢？

嘩，班女人做咩瞓落啲泥度咁激呀？離婚啫，唔使咁睇唔開呀？

是咁的，其實呢個係重慶一位失婚阿太搞嘅輔導班嚟，專係畀一啲同佢一樣咁慘豬嘅失婚女人參加嘅。而問到點解阿太要搞個咁嘅班，佢就話通常啲人受咗咁大嘅情傷都會要生要死，所以最好就畀佢哋「死」下，咁佢哋會自然諗起自己有好多心事未了，唔想死住㗎喇！咁咪可以開始新生活囉！

聽落就好似好有道理喇，但實際又點先？呢位阿姐睇佢出盡吃奶嘅力揸緊雙拳，仲要人在遠方蟬沒有和唱咁大嗌，似乎真係好傷下喎。

但係鏡頭一轉，睇佢合埋手好似稟神咁瞓喺個窿度，係好似冷靜咗嘅。阿太每兩至三個月就會搞一次呢啲班，仲會畀有需要嘅女士免費參與。既然唔使錢，咁有冇效，相信一眾阿太都冇咩所謂嘅～

正所謂，逝去感情如何留得住，既然留唔住，咁咪好似呢個阿太軍團咁，由得佢塵歸塵，土歸土，鍾意咪打多堂齋，然後自己喺個墳度爬返出嚟囉。其實離婚都係一個人生經歷嚟嘅，起碼都叫曾經擁有吖。可憐一眾毒L，連拍拖嘅機會都冇呀⋯⋯不如阿太搞多個單身狗輔導班，等大家可以同單身狗身份say goodbye啦～

封面圖片及資料來源：每日郵報