之前日本有個瘋魔萬千妹豬嘅貓咪收集遊戲，只要買唔同嘅貓糧同玩具就可以吸引到唔同嘅貓貓嚟屋企玩，佢哋走嘅時候仲會留低小禮物?～估唔到呢個遊戲會出到真人版電影，更加估唔到原來現實版嘅貓咪收集只係用一堂梯就搞掂啦！

咪睇呢條梯仔細細，呢堂梯分分鐘會救貓一命㗎～土耳其今個冬天很難過，因為真係好L凍呀！之前土耳其就有好心人畀狗狗入商場避寒，咁尊貴嘅主子點先？有個好心嘅貓奴Ilhan就開放咗自己屋企做喵星人避寒中心，等啲流浪貓可以用條梯爬上去取暖嘞～

「Hi，朕今日又嚟喇，上次叫你買嗰隻罐罐買咗未呀喵？」

睇嚟一眾不羈嘅喵星浪子對於呢個臨時屋企同奴才都幾滿意啵～做牙醫嘅Ilhan最初仲擔心自己整條梯喺出面會令啲鄰居不滿，所以特登加返幾盆花做裝飾，不過似乎人同貓都好滿意佢整呢條梯嘅idea喎。Between，條梯同個窿咁細，啲身形比較圓潤嘅主子會唔會入唔到㗎？

放心啦，Ilhan除咗整呢堂梯，佢自己都有去做義工，四圍去探啲流浪嘅貓貓狗狗，希望盡可能唔畀佢哋捱餓。如果主子太肥美入唔到去，Ilhan抱埋你上去又點話呀～好彩有Ilhan呢堂梯，貓貓先唔會凍到上錯天國的階梯咋～Ilhan屋企招呼咗咁多喵星人，唔知佢遲啲會唔會收到好多主子嘅愛的禮物呢？

封面圖片及資料來源：the Dodo