結婚話晒一生人得一次，梗係要詳盡諗下點搞好啦，有人話最緊要係身邊人係自己最愛嗰個，其他乜都唔重要，亦都有人話每個細節都要做到最好先得，行禮嗰日仲要當正自己嘅show咁搞，要降落傘婚禮呀、潛水婚禮呀呢啲咁大陣仗嘅先夠難忘咁話喎！

話說美國有一對新人最近就喺水族館舉行婚禮喇，佢哋唔係貪得意先揀呢度㗎，其實佢哋當初就係喺呢度識嘅，咁喺返同一個地方拉埋天窗都好合理吖～行禮當日，佢哋就企喺個大魚缸前面，由證婚人主持婚禮喇。有條小白鯨見咁多人，咪游近塊玻璃度湊下熱鬧囉，佢個神情好似專心聽緊證婚人講嘢咁?呀！呢個特別嘉賓個樣咁打耳，一班PS大神就出手幫佢改圖喇！

「嘩，有人類結婚呀！咁大日子梗係要吹雞，call埋成班鄉里嚟見識下啦！講明先我哋海底世界講心唔講金，絕對絕對絕對唔知畀人情係乜嘢㗎下！聽都未聽過！」

Btw，張冚家白鯨齊出動嘅相唔知係咪密集咗啲，望得耐好似有少少不安……

「講講講仲長氣過我老母，不如都係等我嚟做證婚人啦！呢pair 新人早幾年喺度邂逅嗰陣我已經睇住㗎喇，一早都話佢哋有夫妻相㗎啦！」

「愛人結婚了，新娘……就是我！Darling你唔使驚呀，我去搵烏蘇拉用把聲換個下半身返嚟就可以同你一生一世㗎喇！」

乜又係你呀侵生？雖然侵侵收起黑面，展露笑容嘅樣係幾少見，睇落神情仲相當和藹可親?，好似……不過點解明明講緊水族館婚禮都要見到佢喎，夠喇，畀我抖下啦好嗎！

PsBattle: Beluga Whale at wedding from photoshopbattles

封面圖片、資料來源連結：reddit