之前大陸有人拍咗段片示範喺辦公室用飲水機打邊爐，真係創作力量同幻想會嚇你一跳呀！啲人都話有冇咁誇張呀，打完邊爐部機仲使要嘅？嗱，拍片呢家嘢要誇同夠爆就當然啦，但係你班人唔通又冇試過喺Hall度用水煲或者電飯煲打邊爐咩？之不過成日都係烚下烚下，畀啲新意嚟好冇？

好似呢位網友就醒嘞，失驚無神想食蝦，白灼又好似淡口咗啲，燒先夠晒風味㗎嘛～Yo！冇燒烤爐冇焗爐咋嘛，使乜驚呀～有電暖扇咪得囉！

嘩，好多隻蝦呀！細個成日畀人叫唔好黐咁埋個暖爐度，如果唔係就會辣親變燒豬㗎喇～今日先知原來唔係燒豬，係燒蝦呀！

一隻隻蝦攝住喺個框度好似曬太陽咁，係咪真係燒得熟㗎？不過望住啲蝦紅都面晒，睇嚟係真係食得㗎啵～呢個用嚟做示範畀啲小朋友睇一流呀！睇下啲死?仔以後仲敢唔敢手多多亂咁摸！

最緊要嘅係唔似拎飲水機打邊爐咁，打完又要洗嘢又盛，仲分分鐘以後唔用得，呢個電暖扇燒完蝦都仲用到不特止，以後每次開嘅時候仲會有陣海水嘅鹹味，真係好Refreshing呀！冬天喺屋企吹住暖風，仲可以有喺海邊度假嘅感覺，邊夠你玩呀。

封面圖片及資料來源：我們愛講冷笑話／微博