老老77，有得揀你要女定要兄弟先？唔好呃自己喇 ，大家係時候停一停，面對我哋見到嘅現實。現實係，你班友仔全部都重色輕友囉！總有啲兄弟出Pool前就一Call即到，出Pool後就搵佢唔到。呢啲兄弟，我哋會形容佢為已經壯烈犧牲咗，因為喺有生之年，除咗等佢回魂會間中蒲下頭，恐怕都好難見到佢喇。

喺英國有班好兄弟，其中一個叫Adam哥，佢好好彩咁由兵仔升咗做大將，之後就陣亡同班好兄弟失聯喇⋯⋯無論一班老友點搵都搵唔到佢，真係比悲傷更悲傷呀！為咗紀念呢位朋友，佢哋成班巴打決定搞返個追思會。

呢班老友幾有心，話明要悼念，梗係要有佢張黑白相，同埋佢生前…唔好意思，係失聯前最愛嘅嘢，即係煙、棒球帽、遊戲機手掣同啲Game碟。睇嚟一眾老友真係好了解佢喎！

大家仲濟濟一堂咁坐晒喺度，有人負責致詞同主持，有人就負責久唔久傳出一啲唔知喊緊定恥笑緊嘅淒厲叫聲，而戲肉就係大家好有感情咁合唱《Can’t Take My Eyes Off You》，真係聽到毛管都戙埋呀！

雖然咁玩好似好賤，但係有一班朋友願意為咗你搞咁大場大龍鳳，呢啲係咩呀？係愛呀Adam！你感覺到兄弟嘅呼喚未呀？返來啦Adam⋯⋯返來啦⋯⋯

溫提：每個朋友嘅玩得程度都唔同，玩都記住睇人嚟玩呀。而有異性嘅朋友就最好有返啲人性，唔係就唔好怪班Fd子唔當你係個生勾勾嘅人啦知冇？

封面圖片及資料來源：benhull69／twitter、Boredpanda