今日3月3日對於好多香港人嚟講，最值得慶祝嘅咪就係happy Friday囉！返一至五嘅朋友仔聽日又可以大覺瞓喇～但係對於日本人嚟講，3月3日係一個特別嘅日子，就係女兒節嘞！女兒節就梗係要有女兒節娃娃，咁先夠應節㗎啦～

不過擺之前，揀位係好重要嘅，特別係屋企有養貓嘅你，你都唔想天皇皇后畀主子搞到甩皮甩骨㗎係咪？好似呢位網友咁，你真係諗住放喺度？呢度主子地盤嚟㗎喎～

「唔好以為我唔知你諗咩呀下，諗你都唔好諗呀你，我張龍床嚟㗎！」

喂聖上，借住嚟擺啲嘢先啫，擺完咪讓返個位過你囉，最多畀返幾個罐罐你做場租吖～不過愚蠢嘅人類又點會知道主子個心諗咩吖⋯⋯

套女兒節娃娃好靚好整齊啵～但點解好似多咗啲野咁嘅⋯⋯喵皇你做咩上埋去做娃娃呀？仲要夾喺天皇同皇后中間做第三者?！究竟主子係點樣喺唔整冧任何嘢嘅情況下坐喺上面㗎呢？

「望咩呀奴才，朕恩准咗你擺公仔咋，冇話唔上嚟坐喎！咁大個宮殿都唔邀請朕嚟飲杯茶，乜咁唔畀面呀？」

咁又係嘅，剷屎官你出手咁低，畀幾個罐罐就想主子讓張龍床畀你？起碼要每日增加三個按摩環節，每次八個鐘啦！

「呢間屋所有嘢都係朕嘅！包括你在內。所以皇后都係朕嘅皇后，知冇？」

聖上呀，奴才明㗎喇，不過你起返身先啦，你咁有份量嘅身體，皇后頂唔住㗎。睇嚟呢個女兒節，主子都係會留喺呢個女兒節娃娃最高層嘅權力核心度㗎喇，貓奴，你睇開啲啦～

封面圖片及資料來源：chocolatpluie／twitter

お雛様にもたれるのはやめなさい！
でのそのカメラ目線w
3年目になると余裕さえ感じる、、 pic.twitter.com/BoPGdb8xF2

— chocola☆ (@chocolatpluie) 2017年3月2日