自己嘆同主子嘆，你揀邊樣？唔准諗，即刻答！如果你係畀主子嘆先，咁你就係一個偉大又稱職嘅貓奴喇。而家有好多可憐嘅貓奴，連自己間屋都唔知點住呀，得嗰豆潤咁細間屋，主子肯屈就同你住你就應該感恩啦～咁做奴才嘅係咪應該有返啲表示先？

做奴才嘅，唔使下下用罐罐收買貓心嘅～如果你好似呢位台灣網友咁，肯犧牲下自己嘅生存空間，又有啲神手同事，咁咪可以幫主子做個五星級的家囉～

豪宅笨唔係下下都要用金錢推砌嘅～用紙皮推砌都得㗎啫～網友嘅同事真係唔話得，放咗工都仲肯花咁多時間砌四層豪宅出嚟，仲要明顯精心計算過點樣放啲結構柱最實淨，同時又畀到最多嘅空間畀主子郁動，果然孺子可教呀下～

咁作為用家嘅主子梗係要係製作過程間中監工一下，畀下意見喇～

「朕間豪宅除咗要有房有廳，仲要有遊戲室㗎喵，設計最好簡單得嚟又有啲品味咁囉，總之就⋯⋯（下刪三百字）」

經過主子嘅專業意見，加埋一班貓奴眾志城城為主子嘅心，呢座喵蘆・巧岸居終於起好喇！邊個話皇帝淨係瞓張床㗎？喵皇除咗瞓，仲要做手部運動㗎，呢間豪宅唔止有大房同Penthouse, 仲有埋奴才為主子悉心設計嘅磨爪區同埋遊戲區呀！喂，呢位奴才，你做壞晒啲規矩，叫啲住劏房嘅貓奴情何以堪呀？

其實，主子揀選得你，佢都唔介意你個奴才住咩㗎啦～就算你要瞓街，主子咪一樣對你不離不棄，一樣會等你幫佢剷屎～你話係唔係呀哈姆太郎？

封面圖片及資料來源：Ettoday、Nana Huang／貓咪也瘋狂俱樂部