對廢青嚟講，連錢都冇，又點儲錢呢？既然開源唔得，咪試下節流囉！最近，有台灣網民就開心些牙咗一啲自己學生時期嘅慳錢心得，事不宜遲，即刻同大家睇下佢有咩慳錢招式先！

【第一招：汁撈飯】

想慳錢但又想填飽個肚，食飯就最好㗎嘞。唔想齋食白飯咁dry？去food court買碗白飯，然後再攞去側邊嘅調味料區度加啲汁汁，豉油、辣油任君選擇，咁咪唔怕dry囉！

呢位網民話，用入面有蔥同辣椒嗰隻蒜蓉醬嚟撈飯就最正喎。

網民實戰經驗（已fail）：

有次呢位網民就入咗間餐廳，佢一睇menu，樣樣嘢都起碼要70蚊台幣，所以佢就淨係叫咗碗白飯（台幣$20）同麻婆豆腐醬（台幣$40），諗住加埋都係60蚊台幣，都叫有慳到吖！點知老闆一問佢使唔使加隻蛋，佢就口快快話好，結果搞到埋單用咗70蚊台幣呀。嗯，要畀70蚊台幣嘅話做咩唔好好地叫個飯呀？呢個故事教訓大家，要慳一定要夠定力。

【第二招：再見亦是汁汁】

呢招嘅關鍵都係汁，不過呢招同頭先嗰招唔同嘅地方就在於呢招啲汁係會循環再用。意思即係，假如你第一餐係食湯麵嘅，咁你咪唔好飲啲湯，留返啲湯下一餐要嚟煮麵撈飯乜都好囉！

網民實戰經驗：

買一碗乾意麵（台幣$25）做lung廚，將食剩嘅滷汁留起，然後再買個老母麵（台幣$8）做晚餐，老母麵加滷汁就會變成一碗湯麵。咁樣計落一日都只係用咗33蚊台幣，而且仲好好味?（佢話）！

【第三招：窮人恩物－方包加果醬】

超級市場成日都會將啲就嚟過期嘅方包大平賣嘅，喺呢個時候入貨就最抵。方包配埋果醬……咁一日三餐咪又搞掂囉！

【第四招：將最重要嘅嘢變成唔重要嘅嘢】

黎明曾經話過，一個魚柳包冇咗最重要嘅魚柳，就唔再係魚柳包。但呢位網民就表示，為咗慳錢，佢連食熱狗都唔會夾熱狗腸，淨係會搽醬㗎咋！一個冇咗熱狗腸嘅熱狗都仲係熱狗！

網民實戰經驗：

想當年，早餐店一份朱古力多士都只係10蚊台幣。雖然10蚊台幣已經好抵，但呢位網民認為沒有最抵，於是佢就問老闆，多士唔烘底可唔可以減兩蚊……

【第五招：靠屋企食屋企】

靠山食山，靠海食海，靠屋企咪食屋企囉！想慳錢嘅，用屋企啲零食嚟頂肚都係一個唔錯嘅選擇。

呢位網民話，屋企啲零食當中cp值最高嘅就係鳳梨酥同太陽餅，佢話呢兩款零食熱量高，食完再飲一大杯水就可以頂好耐都唔覺肚餓，特別適用於早餐同午餐。

睇完呢位網民嘅慳錢招式之後，毛毛不禁想問句……到底一個人要有幾等錢洗先可以諗到呢啲慳錢招式出嚟呢？見到呢位網民慳錢慳到咁樣樣，真係搞到毛毛酸都鼻埋呀！同志們，辛苦了！

btw，雖然你真係好慳家呀，但成日咁樣食法會唔會營養不良㗎？唔好因為慳錢慳到身體出問題好喎！

又btw，介唔介意講埋家陣銀行戶口有幾多錢同買到樓未呀？冇，毛毛八掛下啫…八掛下啫……

資料來源：dcard