上車有幾難呀，學某某會話齋，兩個人唔食唔飲7個月就夠首期啦！再唔係學某某姐咁儲105%仲快呀～但係我哋呢啲毒L又冇人一齊儲錢，作為一個廢青，仲要久唔久去下日本旅行同睇下戲?，真係想買個床位都難呀⋯⋯

當香港人仲頭痕緊儲首期，估唔到遠處嘅戰鬥民族，竟然研發咗個平靚正嘅上車選擇呀！咪臭係用3D打印技術起屋囉～之不過咁，要3D打印啲細細件嘅杯呀，手機套嗰啲嘢，部機已經好大嚿喇啵，仲話要印間屋出嚟，咁部機咪好似間工廠咁大？

傻豬嚟嘅，畀你估到就唔係戰鬥民族啦，本來係真係要起好大部機先可以逐個部件印出嚟再組裝㗎，但係俄羅斯一間公司就成功將部3D打印機做到可以運送嘅大細，再係施工範圍放一部石屎泵機，就可以開工起屋喇～

望住部機喺咁左轉轉右轉轉就起到間屋，有冇咁神奇呀？就係咁神奇，仲要唔使一日就起咗間四百呎嘅筍盤出嚟呀！

嗱，一日係淨計起間屋咋下，咁起完係咁意都要畀多一日出嚟裝修下嘅，整返啲窗呀屋頂呀咁，再加個髹牆假期，跟手放埋啲傢俬，就入得伙㗎喇，至抵死嘅係唔計傢俬，成間屋連裝修鋪電線，埋單都只係萬一蚊美金唔使，即係十萬蚊港紙就有四百呎屋仔住，正呀喂！

唔好成日以為平嘢就冇好先得㗎，雖則呢間屋只係要蔗渣嘅價錢，但絕對唔係豆腐渣嘅質素㗎～保暖同隔音做到足，間屋仲可以住超過五十年?！唔好講第樣，淨係五十年不變呢樣嘢都夠晒煞食啦！不過喺香港，就算幾平都冇用啦，土地問題咁嚴重，唔通真係學689話齋喺郊野公園起咩？

封面圖片及資料來源：Boredpanda