愚蠢嘅人類，你哋以為喵星人只係想賣下萌，得到你哋嘅寵愛同崇拜咁簡單咩？其實一班主子係想統治地球呀！不過要侵略地球，首先都要派臥底了解下人類嘅文化同統治方式嘅，估唔到主子除咗派十萬個黨員潛伏各大城鎮，仲要連司法機關都有無間道呀！

是咁的，有個台灣網民為咗做通識功課就去咗參觀軍事法庭，嗱，話晒軍事法庭，嚴肅啲，唔好笑呀下，莊重啲先得㗎。咦？點解審判官個位有兩個尖尖突咗出嚟嘅？

「笑咩呀？本喵今日身為審判官，重審呢單案，都未傳你，你就企出嚟畀我鬧，你話你係咪奴才呀喵！」 

原來係喵大人呀！奴才拜見喵大人！不過見到喵大人咁可愛咁坐喺度，真係好難唔笑㗎喎～連後面蔣生都冇眼睇喇。

「你藐視本喵，而家就罰你，要買十個罐罐賠償本喵嘅心理創傷呀！快啲出庭交罰款！」

係係係，奴才知錯㗎喇，而家就去呀下⋯⋯

「買咗罐罐未呀？朕收工肚仔餓喇喵～」

咦，乜又係你呀法官大人？所以話，再威武嘅法官大人都有收工嘅一日嘅～收咗工咪又係一隻普通貓，都會餓，會空虛寂寞會覺得凍㗎。你睇下佢幾黯然，奴才仲唔快啲用愛同罐罐包圍主子！

封面圖片及資料來源：kiyounin／PTT