2017年03月08日 星期三
【咪掟啦好冇】遊客強行投幣許願 搞到海龜一肚散銀
去旅行一經過啲水池，就自然會有條友大叫話係許願池，跟手喺個袋度拎啲散銀出嚟起勢咁掉，最神奇嘅係又會有其他人跟住掉㗎啵。老老77，噴水池就話冇所謂啫，最多咪當裝飾，清潔姐姐仲可以順便賺啲外快?，但係池塘咁多魚仔龜仔，你哋有冇諗過佢哋感受呀？仲要有啲人無良到昆9其他人話要掟中龜龜個頭先靈，真係掟你個頭呀！
叫咗你哋班人唔好係又掉唔係又掉㗎啦，出事㗎嘛！搞到泰國有隻海龜要入醫院喇！你咪以為冇掟佢個頭就冇事，呢隻龜叔唔係整親個頭，係畀你班人搞到頂住個胃呀！
睇下龜叔個電腦掃描，個胃黑猛猛咁，係咪食錯嘢呀？呢隻龜叔住喺個池塘度，平日都會唔小心食咗啲泥同沙石，但係呢啲都係小兒科，最弊係個池有太多銀仔，龜叔唔小心吞埋落肚呀！消化不良之餘又痾唔到出嚟，重到連個殻都裂埋呀！
好彩畀海軍發現咗龜叔好似唔多妥，游極都游唔起咁，送入醫院先知佢個肚有成915個銀仔，連埋其他嘢重成5 kg呀！一班獸醫哥哥姐姐幫龜叔做完手術拎返啲銀出嚟之後，仲幫佢改咗個名叫阿Bank，唔通襯返佢成肚錢好似錢罌咁？
喂，呢個銀仔咁熟口面嘅，隱隱約約有朵綻放嘅花，咁似⋯⋯嗱嗱嗱，毛毛冇話肯定係港幣呀下，any肥，希望唔關大家事啦，如果香港人成日笑人唔文明但自己又做埋啲晒咁嘅嘢，真係失禮街坊㗎。
心願呢家嘢就人人都有，但並唔係度度都啱祈福㗎。古乳有暈，人在做，天在看，掉一個銀仔，害咗條生命，許咩願都唔慌靈啦係咪？所以唔好亂掉嘢喇，換轉係你，你都唔會想喺屋企坐坐下畀人用垃圾或者銀仔掉啦，係咪先？
封面圖片及資料來源：Dr. Nantarika Chansue／Facebook
