如果你以為書店入面有好L多文青，就連啲書店職員都特別有書卷味嘅話⋯⋯好心你哋咁大個人就唔好咁多幻想啦～邊得嚟咁多書卷氣同文青呀，平日連人影都唔多個，最多咪臭係啲嚟買補充練習同教科書嘅怪獸家長囉！

嘩，咁喺書店做嘢咪好悶？傻豬嚟嘅，打工嘅最高境界係咩？係寓娛樂於工作呀！返緊工都可以照影相打卡呃like，呢啲咪叫高囉～好似法國呢間書店嘅員工，玩到連腦細都讚好呀！

想呃like唔使下下淨係扮睇書影不經意文青照嘅，識影梗係玩變臉啦！好似呢個靚女店員，唔止個面型，連眼睫毛都Perfect Match個封面呀！

嚟多個完美示範，店員嘅一頭紅髪，連長度同埋接合位嗰條頭髮都夾啱晒位，就算你已經變咗中女，都可以即刻變少女呀！不過好多人都係咁拎啲嘢遮住塊面影㗎啦，仲有冇呀？

面型同髮型都輕鬆啦，最強嘅係連個身型都咁夾呀～睇下呢個大叔個肚腩同書下面條美腿，砌出完美嘅線條，仲要連隻袖都夾埋呀！唔知書下面嗰位係六嚿腹肌定好似個封面咁一團和氣㗎呢？

你以為淨係識變第二個咩？變動物都得呀！變熊人又得，變老鼠又得，得咗～再唔係，小紅帽都可以一秒變豺狼呀！不過香港有個唔使拎住本書都識變狼啦～

換轉喺香港玩，一早畀人you're fired咗啦～但係呢班法國書店嘅員工，唔止玩得開心，仲要畀腦細PO埋上挨豬做宣傳，真係關公都要畀個like你呀！睇完係咪突然好想去行下書店呢～記得帶多個fd子幫你影相呀，如果間鋪頭畀嘅話。

封面圖片及資料來源：librairie_mollat／Instagram