歌仔都有唱啦，去旅行～搭車又搭船～ 話就話係車行唔係人行啫，不過你估行得耐個屎忽唔攰㗎？路途咁奔波，夜晚梗係要住返間靚酒店，舒舒服服咁瞓返覺、歎返晚，咁先對得住自己㗎嘛。而家住酒店唔係有張床就夠㗎喇，好多酒店都會將房間裝修做唔同主題，等你次次去都有唔同感覺吖嘛。

其實唔少外國人都好鍾意東方style㗎，所以西班牙有間旅館就整咗間中國風嘅房喇，明明去西班牙但又可以扮晒去咗中國，又幾抵玩啵！話明中國風，紅噹噹就唔少得啦，床頭幅牆仲要用毛筆寫住「喜、福、壽、祿」，真係好有feel呀！

不過，個feel就有少少偏差，變咗殯儀feel啫。紅色牆配上咁好意頭嘅四隻大字、加埋床邊畫龍點睛嘅兩盞白燈，充滿視生猶死嘅意味，明明成間房都紅噹噹但都可以做到白事嘅感覺，呢個設計師真係唔簡單，功力深厚！唔知點解望住張床，就好似聽到有把好遼亮嘅聲音話「有客到─」咁呀……

講到中國風，呢個停車場繳費亭嘅design都唔輸蝕吖，毛毛知你諗緊咩㗎喇，不過其實人哋個idea係嚟自藍白色嘅青花瓷藝術囉。好彩佢係自動繳費機，收卡㗎啫，唔係陣間找個一蚊銀出嚟，真係要使咗佢先敢返屋企囉。

封面圖片、資料來源連結：TAMMY LOVES KOREA、Jiang Guo Hao

延伸閱讀：【異度空間】部繳費機咁嘅款我仲入唔入去交錢好？