由細細個開始，老師就已經教我哋咩叫「字如其人」，即係話啲字寫得整齊，個人就會係愛整潔嘅小白兔、啲字寫到打晒大風咁，個人都會求其啲㗎喎，毛毛淨係知字大嘅人一定自大咋，蝦蝦。字體讀心術咁高深，毛毛就唔識喇，不過睇字跡估下係男仔字定女仔字都仲ok嘅！

「我們要永遠在一起喔，一輩子不離不棄」……嗚呀！好閃呀！而家會拎起枝筆寫寫情信畀男朋友嘅女仔真係好少有㗎喇！

你咁諗就錯喇，其實呢段內容就情深深雨濛濛、字跡就充滿少女風嘅字，其實係出自一個麻甩仔手筆㗎！話說佢有次同班兄弟飲酒飲醉咗，就隨手寫咗呢張紙仔，點知第二日瞓醒竟然收到30幾個由兄弟打嚟嘅miss call喎，原來阿嫂見到張紙仔，以為男朋友偷食呀陰公！好彩佢醒目，即場寫多次同一段字畀阿嫂睇，証明兄弟冇對佢唔住咋！

見到呢隻字體，真係覺得隔住個mon都有顆少女心跳緊出嚟咁呀，加少少effect仲唔係msn時代最興嘅閃字？Btw，同兄弟飲醉酒會爆喊、打人、狂嘔都聽過，寫情書畀兄弟真係第一次見囉嘻嘻，能成為密友～～～

原來唔止呢個男仔㗎，有唔少男網民都表示自己寫得一手少女字，搞到成日畀人笑囉。其實寫字嘅嘢，邊有分性別㗎，整齊咪得囉～

有寫得一手少女字嘅男仔，當然都有調返轉嘅情況啦。講真吖，而家唔係用手機就係用電腦，仲有幾可要揸筆寫字呀，大家都要好好珍惜仲認得你字跡嘅人就真呀。

封面圖片、資料來源連結： dcard