Pokemon Go 話咁快就出咗半年有多，話就話已經少咗好多人玩，但Pokemon都仲有班忠實Fans㗎～不過如果你遇到呢隻就唔知捉唔捉好喇⋯⋯上次提過呢位用超低成本又cos火暴獸又cos多比嘅日本朋友仔，今次又發功出cos，仲要係cos第一代嘅遠古寵物小精靈菊石獸呀！

Cos菊石獸嘅精髓係啲咩呀？係個貝殻同埋啲藍色觸手呀！仲要有一對炯炯有神嘅大眼睛?！

雖然今次都係cosplay寵物小精靈，但我哋今日係唔需要雞蛋六隻同埋糖呢就兩茶匙嘅，要嘅只係一嚿切好咗嘅瑞士卷，仲要係原味啵。唔好咁為食買錯朱古力味呀下，唔係就變咗非洲菊石獸㗎喇～

至於觸手，就梗係要搵返啲近似啫喱狀嘅物體，先可以模擬到觸手Play嗰種黏滑黏滑嘅感覺㗎啦，所以就揀咗藍色嘅Yogurt Jelly嘞～有幾多隻觸手咪買返幾多支囉，如果你想表現菊石獸畀小智打到七彩嘅話，用多幾隻唔同嘅味都冇所謂嘅～
如果你以為佢只係將啲啫喱插落個瑞士卷度再加返對眼，咁你實在太天真啦！咁叫cosplay咩？叫得cosplay，梗係插晒落自己啲窿度啦！

係鼻哥窿同埋個口呀！嘩⋯⋯呢隻菊石獸，真係受咗輻射咁呀⋯⋯仲要露兩點，咁大對⋯⋯眼喎！呢位仁兄cos緊嗰隻菊石獸一定係用緊復活化石嗰陣出咗bug，或者係火箭兵團實驗失敗咗啫，嚇我唔到嘅！今次cos完仲可以食返個殻同觸手落肚?，真係有得食又有得玩仲有得呃like，一次過滿足你三個願望呀！

封面圖片及資料來源：tky888tky／twitter