忍忍忍忍忍！做忍者除咗要識得忍，仲要識得隱！咪臭係講緊隱身術囉～其實隱身術呢家嘢都只係掩眼法嚟㗎啫，咁忍者又唔係變色龍，點都要有返啲道具幫手嘅～首先就要有塊布！塊布要啱大細遮到個人之餘仲要同幅牆同色同款，咁先可以一拉布就你睇我唔到㗎嘛～

好似呢位網民個大女就揀得啱喇，做忍者唔係下下要黑猛猛好似黑旋風咁嘅，有時都要識舉下白旗同冚下白布嘅～特別係屋企幅牆咁白，不過阿女呀，你幅牆咁有線條，唔多平喎，係咪要裝修下佢呀？

正所謂有其姊必有其妹，家姐咁有忍者天份，做阿妹嘅又點可以輸畀佢呢，睇到家姐幅相，阿妹呢個毛文要爆喇！隱身！

咦？阿妹，你確認你隱咗身？你哋班人唔好笑啦，話唔定人哋想隱身隱得靚啲先揀塊花布啫，你而家係咪睇唔到妹妹先～咁都算隱咗身吖，係咪？細個驚畀阿媽打，夠會匿入個被竇度，覺得阿媽會睇唔到啦～

唉～講隱身你哋班人類點練都唔夠主子嚟㗎喇，好似呢塊地氈咁，你以為佢係一塊地氈，其實主子趴咗喺上面呀！不過主子你嗰對好似漆黑中嘅螢火蟲嘅BlingBling眼睛出賣咗你啵～冇計喇，啲人類咁愚蠢，唔留返對眼畀你睇，你真係一腳踩落嚟整傷佢尊貴嘅身體點算呀！

封面圖片及資料來源：rorran／twitter、peco_4696／twitter