你睇過靜宜沖涼咁多次，其實你又有冇真正了解過佢內心世界吖？真係有？咁毛毛嚟問你，佢最鍾意食嘅係咩呀！答唔到呢？係煨蕃薯呀！不過因為次次食完煨蕃薯都會放臭屁，所以佢先唔敢話畀人知咋嘛！天寒地凍，聞到街邊車仔檔賣嘅煨蕃薯同炒栗子香成咁，點忍到手唔買返啲嚟慢慢歎呀～

不過嗰啲車仔檔可遇不可求㗎，你估通街都有煨蕃薯賣咩，求人不如求己，一於自己D.I.Y.啦！Come on！地球已經冇嘢阻止到人類煨蕃薯嘅決心㗎喇！蕃薯，有！暖爐，有！我仲問人借咗個鐵製工具箱?！

根據呢位萬能小廚神平時post嘅相9估，佢應該係做工場嘅，半夜加班凍凍地，咪即場煨個蕃薯嚟叉下電囉！咩呀，吊頸都要抖下氣嘅，最多請你食一啖喇，唔好話畀阿頭知咁衰仔呀。

大功告成！雖然唔係妹豬最愛嘅紫薯，不過隔住個mon都感覺到有陣香噴噴嘅暖流湧緊出嚟咁，真係好邪惡呀！煨蕃薯又飽肚又可以拎住嚟暖手，真係開夜聖物呀！不過咪話毛毛唔提你，食還食，唔好食咁多呀，一陣有另一股暖流喺後面湧出嚟就唔好啦。

たまに残業しながらの焼き芋はうまい。 pic.twitter.com/Vulkrhg82L

— 切削切子 (@lathe24) March 8, 2017

封面圖片、資料來源連結：lathe24／twitter

《萬能小廚神系列》
【嚇死人咩】以為邊個咁睇唔開 打開石油氣罐 原來係燒雞！

【你真識食】突然想食燒蝦冇焗爐咪改用電暖扇囉！