做人父母甚艱難，小朋友有時真係好百厭，但佢又唔知自己做錯喎，做阿爸阿媽嘅唔可以亂發脾氣，要好有耐心咁話畀個小朋友聽究竟衰咩，又要諗下點樣執阿仔啲手尾，真係EQ低啲都唔得呀！千祈唔好睇少阿仔阿女嘅破壞力，佢哋爆起上嚟，分分鐘施展「無敵㨃穿牆」?呀！

是咁的，有個日本阿爸只係睇少阿仔一陣，幅牆就穿咗個窿喇！唔通阿仔靜雞雞學咗一陽指？原來係阿仔畀幅牆挑釁，咁阿仔咪試下佢係咪真係銅牆鐵壁，拎把較剪㨃落去囉！

阿仔細細個就咁有武學天份，係叻豬嘅，但係屋企幅牆外表堅強，內裡紙漿，畀阿仔咁樣一插點補呀⋯⋯都係嗰句啦～動動腦，轉轉彎咪會快快解決了問題囉！

有個窿咪塞返碌嘢入去囉！成碌劍塞入去，變咗牆中神劍，幾有型！肯肯定嚟到佢屋企玩嘅人都忍唔住喺度打個卡呀～

「只有品德兼備同意志堅強嘅勇士先可以掹得出呢把劍！」

咪住先，但呢把明明係幪面超人KIVA把魔皇劍嚟㗎啵，咁還原返個場景係咪應該拆咗隻Zanvat Bat出嚟先呢？

係囉～咁先啱㗎嘛！但係把劍會唔會大個KIVA多得滯呢？雖然都叫話化牆窿做場景，都幾醒嘅，但係人哋老竇，你同阿仔㨃得咁開心，你老婆知道嗎？幪面超人呢啲男人嘅浪漫，老婆就未必明，不過你兩個玩個牆個窿玩得咁高興，就小心有人喺你後面好㷫喇～

封面圖片及資料來源：jHBdMyw6TgkEwDX／twitter